पुणे
शिवीगाळ केल्याचा मनात राग ठेवून एकाने आपल्या मित्राचा दगडाने ठेचून निर्घृणपणे खून केल्याची घटना मदनवाडी (ता. इंदापूर) येथील वन विभागाच्या जागेमध्ये सोमवारी रात्री उशिरा घडली. यामुळे भिगवण परिसरात या घटनेने खळबळ उडाली आहे.
विजयकुमार विठ्ठलराव काजळे ( वय ४५ वर्ष मूळ रा. निरगुडे ता.इंदापूर, हल्ली रा. मदनवाडी ता. इंदापूर) असे खून झालेल्या तरूणाचे नाव आहे. सदरची घटना माध्यमिक विद्यालया समोरील रस्त्यावरच घडल्यामुळे येथील परिसर भीतीच्या छायेखाली आहे.
याप्रकरणी भिगवण पोलिसांनी राज भगवान शिंदे (बंडगरवस्ती, मदनवाडी ता.इंदापूर) या आरोपीला अवघ्या चार तासांत अटक केली.मृताची पत्नी भाग्यश्री काजळे यांनी दिलेल्या फिर्यादीनुसार शिंदे याच्यावर खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, विजय काजळे व राज शिंदे हे मित्र होते त्यांनी सोमवारी रात्रीच्या वेळी गप्पा मारल्यानंतर काही कारणावरून त्यांच्यामध्ये वादावादी झाली शिवीगाळ केल्याचा राग आल्याने आरोपी शिंदे याने काजळे याचा दगडाने ठेचून खून केल्याची पोलिसांना कबूली.
सदरची घटना रात्री एकच्या सुमारास घडली. सकाळी हा प्रकार नागरिकांच्या लक्षात आला.घटनेची माहिती समजताच भिगवण पोलिस ठाण्याचे सहाय्यक पोलिस निरीक्षक विनोद महांगडे,पोलिस उपनिरीक्षक प्रवीण जर्दे, पोलिस उपनिरीक्षक अमित पाटील यांनी घटनास्थळी धाव घेतली व सदर घटनेचा पंचनामा केला व तपासाच्या दृष्टीने महत्त्वाचे धागेदोरे शोधण्यासाठी परिसरातील सीसीटीव्ही चे फुटेज तपासून तांत्रिक विश्लेषणाच्या सहाय्याने शोध घेण्याचा प्रयत्न केला.
दरम्यान घटनेचे गांभीर्य ओळखून बारामती विभागाचे पोलिस विभागीय अधिकारी डॉ.सुदर्शन राठोड यांनी देखील घटनास्थळी भेट दिली. आरोपीला चार-पाच तासाच्या आतच मुसक्या आवळण्यात भिगवण पोलिसांना यश मिळाले.
