पुणे
श्रावणी बाळा तुझ्या बापूला शक्य झालंच तर माफ कर. मी माफी मागायच्या पण लायकीचा नाही अशी पोस्ट सोशल मीडियावर करत एका शिक्षकाने बँकेसमोर जीवन संपवल्याची धक्कादायक घटना बीडमध्ये घडलीय.बीड जिल्ह्यातल्या केज इथं स्वराज्य नगर भागात कृष्णा अर्बन को ऑपरेटिव्ह बँकेची शाखा आहे. या शाखेच्या समोर शिक्षकानं आत्महत्या केल्याचं शनिवारी सकाळी उघडकीस आलं.
शिक्षकाने आत्महत्येआधी फेसबुकवर पोस्टही केलीय. ही घटना समोर येताच पोलीस घटनास्थळी दाखल झाले आहेत.याबाबत मिळालेली माहिती अशी की, आत्महत्या केलेल्या शिक्षकाचं नाव धनंजय अभिमान नागरगोजे असं आहे. केळगाव इथं कायम विनाअनुदानित आश्रम शाळेत ते शिक्षक म्हणून कार्यरत होते. २०१९ मध्ये २० टक्के अनुदान राज्य सरकारने घोषित केलं. पण त्याची अंमलबजावणी झाली नव्हती.
गेल्या अनेक वर्षांपासून काम करणाऱ्या या शिक्षकाला अनेक अडचणी होत्या. शेवटी बीडमध्ये बँकेच्या दारातच गळफास घेत जीवन संपवलं. आत्महत्येचं नेमकं कारण समोर आलं नाही. अंगावर कुणाचंही कर्ज नाही आणि कुणाला फसवलं नसल्याचंही शिक्षकाने फेसबुक पोस्टमध्ये म्हटलंय.
मुलीला उद्देशून पोस्ट लिहिताना आत्महत्येआधी बापाने म्हटलं की, श्रावणी बाळा, शक्य झालं तर एकदा माफ कर तुझ्या बापूला. कारण मी तुला एकट्याला सोडून जातोय. तुला अजून काही कळत नाही, तीन वर्षे वय आहे तुझं… तुला काय कळणार, ज्यांना कळायला पाहिजे त्यांना कधी बापू कळला नाही.बाळा बापूंनी कधीच कुणाचं नुकसान केलं नाही. सर्वांशी चांगला वागला. पण नालायक राक्षस लोकांनी अंधारातून खूप छळ लावलाय.
मला हे लोक हालहाल करून मारणार आहेत असं म्हणत शिक्षकाने सहा जणांची नावेही फेसबुक पोस्टमध्ये लिहिली आहेत. विक्रम बाबुराव मुंडे, विजय विक्रम मुंडे, अतुल विक्रम मुंडे आणि त्यांचे कार्यकर्ते उमेश रमेश मुंडे, गोविंद नवनाथ आव्हाड, ज्ञानेश्वर रजेभाऊ मुरकुटे ही नावे शिक्षकाने लिहिली आहेत.
शिक्षकाने पुढे लिहिलंय की, मला मारण्याचं कारण म्हणजे मी फक्त विचारलं होतं की, मी तुमच्या शाळेवर गेली १८ वर्षे झालं काम करतोय अजून मला पगार नाही, आता पुढे काय करायचं? त्यावर विक्रम बप्पा म्हणले तू फाशी घे म्हणजे तू मोकळा आणि मी पण दुसरा तुझ्या जागेवर कर्मचारी भरायला मोकळा हे एकूण माझ्या पायाखालची जमीनच सरकली आणि तिथून पुढे या लोकांनी मला त्रास देण्यास सुरुवात केली.
श्रावणी बाळा हे सर्व राक्षस आहेत या राक्षसामुळेच मी तुझ्यापासून दूर जात आहे. तुला एकदा पाहण्याची माझी खूप इच्छा होती पण मी एक दळभद्री बाप तुझ्या वाट्याला आलो. काय करू माझ्यापाशी कोणता पर्याय या लोकांनी ठेवला नाही. बाळा डोळ्यातलं पाणी थांबत नाही. पण त्याग केल्याशिवाय पर्याय नाही असंही पोस्टमध्ये शिक्षकाने म्हटलंय.
