पुणे
पीएमपीएमएलवरील ड्युटी संपवून दुचाकीवरून घरी निघालेल्या एका 40 वर्षीय तरुण अपघातात गंभीर जखमी झाल्याची घटना घडली आहे. चारचाकी व दुचाकी यांच्यात उरुळी कांचन – जेजुरी रस्त्यावरील शिंदवणे (ता.हवेली) ग्रामपंचायत हद्दीतील वाकवस्ती परिसरात मंगळवारी (ता. 11) रात्री पाऊणे अकरा वाजण्याच्या सुमारास हि घटना घडली आहे.
सचिन दिलीप कुंजीर (वय – 40, रा. कुंजीरस्थळ, वाघापूर, ता. पुरंदर) असे अपघातात गंभीर जखमी झालेल्या पीएमपीएमएल चालकाचे नाव आहे.तर चारचाकीतील 2 महिला,2 पुरुष व 5 लहान मुले सुखरूप असल्याची माहिती मिळाली आहे.
मिळालेल्या माहितीनुसार, सचिन कुंजीर हे पीएमपीएमएलवर चालक म्हणून काम करतात. नेहमीप्रमाणे सुट्टी झाल्याने कुंजीर हे उरुळी कांचनवरून राहत असलेल्या वाघापूर या ठिकाणी त्यांच्याजवळ असलेल्या दुचाकीने निघाले होते. तर जेजुरी या ठिकाणावरून देवदर्शन करून उरुळी कांचनच्या बाजूने एक चारचाकी निघाली होती. यावेळी गाडीत 2 महिला, 2 पुरुष व 5 लहान मुले होती.शिंदवणे ग्रामपंचायत हद्दीत आले असता चारचाकीवरील चालकाचे नियंत्रण सुटले व समोरून येणाऱ्या कुंजीर यांना जोरदार धडक दिली.
या धडकेत कुंजीर हे गंभीर जखमी झाले. यावेळी त्या परिसरात राहणाऱ्या आकाश महाडिक, गणेश शितोळे, अभि महाडिक, ऋषिकेश महाडिक, तुषार शितोळे, यश महाडिक, यांनी तात्काळ रुग्णवाहिकेला माहिती देऊन कुंजीर व त्या चारचाकीतील नागरिकांना मदत केली. अशी माहिती स्थानिक नागरिकांनी दिली आहे.
दरम्यान, अपघातात जखमी झालेल्या कुंजीर यांना नागरिकांच्या मदतीने रुग्णालयात दाखल करण्यात आले असून त्यांच्यावर उपचार सुरु आहेत. कुंजीर यांच्या डोक्याला,छातीला,मोठी दुखापत झाली असल्याची माहिती मिळत आहे.
