पुणे
प्रियकरासोबत सेक्स करताना आईने पाहिल्याने मुलीने प्रियकराच्या मदतीने आईचा खून केल्याची धक्कादायक घटना घडली आहे. मुलगी आणि तिच्या प्रियकराने गळा दाबून आईचा खून केल्याची घटना रायगडातून समोर आली. रायगडच्या परखंदे अहिल्यानगर गावात ही घटना घडली आहे.
४२ वर्षीय मृत संगीता मारुती झोरे या दोन मुलींसह परखंदे अहिल्यानगर या गावात वास्तव्यास होत्या.पोलिसांच्या माहितीनुसार, मंगळवारी १० सप्टेंबरला पहाटे साडेचारच्या सुमारास संगीता यांना अचानक झोपेतून जाग आली. त्यावेळी संगीता यांनी आपली मोठी मुलगी भारती हिला तिचा प्रियकर संतोष दत्तात्रय नांदगावकर याच्यासोबत सेक्स करीत असताना पाहिले.
संगीता यांनी आरडाओरड करण्यास सुरुवात केली एवढ्यात संतोष नांदगावकर याने संगीता यांचे तोंड दाबले आणि त्यांनी जमिनीवर पाडले. त्यांच्या तोंडावर ब्लॅन्केट दाबून धरले. तर मुलगी भारतीने आई संगीताचे पाय धरुन ठेवले. संगीता यांनी प्रतिकार करण्याचा प्रयत्न केला पण श्वास कोंडल्याने त्यांचा जागीच मृत्यू झाला आहे.
एवढ्यावरच न थांबता भारती आणि संतोष यांनी संगीत यांच्या खुनाचा पुरावा नष्ट करण्याच्या उद्देशाने त्यांचा मृतदेह साडीने घराच्या छताला असलेल्या लोखंडी पाईपला लटकवला व त्या ठिकाणी लाकडी स्टूल ठेवून आत्महत्या असल्याचे भासवले. परंतु संगीता यांची दुसरी मुलगी सुरेखा घडलेला हा सर्व प्रकार आपल्या डोळ्यांनी पाहिला. तिने आपल्या नातेवाईकांना या प्रकाराची माहिती दिली.
नातेवाईकांनी भारती झोरे आणि तिचा प्रियकर संतोष नांदगावकर विरोधात खालापूर पोलीस ठाण्यात तक्रार दाखल केली. पोलिसांनी तक्रारीची दखल घेऊन प्रेमी युगुलाविरोधात गुन्हा दाखल करुन त्यांना बेड्या ठोकल्या आहेत. याप्रकरणी पोलीस निरीक्षक सचिन पवार अधिक तपास करत आहेत.
