पुणे
राष्ट्रवादी काँग्रेस (शरदचंद्र पवार ) पक्षाचे सर्वेसर्वा शरद पवार यांनी पश्चिम महाराष्ट्रामध्ये महायुतीला जोरदार धक्के द्यायला सुरवात केली आहे. पश्चिम महाराष्ट्रातील मोठं घराणे असणारे मोहिते पाटलांना शरद पवारांनी पक्षात प्रवेश देऊन महायुतीला पश्चिम महाराष्ट्रात सर्वात मोठा धक्का दिला आहे.
त्यानंतर आता शरद पवारांनी आपला मोर्चा हा बारामती मतदारसंघाकडे वळवत लेक सुप्रिया सुळे यांच्यासाठी मैदान सोप्प करायचं ठरवलं आहे. यासाठी शरद पवार यांनी एक मोठी खेळी खेळली आहे.बारामती लोकसभा मतदारसंघात धनगर मतदार हे मोठ्या प्रमाणात आहे.
त्यासाठी आता शरद पवार यांनी थेट अहिल्यादेवी होळकर राजघराण्याचे तेरावे वंशज असलेले भूषणसिंह होळकर यांनाचं थेट गळ घातली असून सुप्रिया सुळे यांचा उमेदवारी अर्ज दाखल करण्याच्या दिवशी पक्षात प्रवेश देणार आहेत. येथे १८ तारखेला भूषणसिंह होळकर पुण्यात राष्ट्रवादी काँग्रेस (शरदचंद्र पवार) पक्षात प्रवेश करणार आहेत.
भूषणसिंह होळकर यांच्या प्रवेशानंतर बारामती मधील गणित पूर्णपणे बदलणार आहेत. राजकारणाचे वंशज असलेले भूषण सिंह होळकर यांच्या येण्याने धनगर मतदानावर मोठा परिणाम होणार असून पवारांना त्याचा फायदा होणार आहे.दरम्यान, साधारणपणे एका वर्षांपूर्वी शरद पवार आणि भूषणसिंह होळकर यांच्यामध्ये कमालीचा वाद पेटला होता.
वाफगावचा किल्ला स्वतंत्र करावा यासाठी भूषणसिंह होळकर गेल्या अनेक दिवसांपासून पाठपुरावा करत आहेत. यादरम्यानच वाफगावचा सातबारा हा काय पवारांच्या नावावर आहे का? असा थेट घणाघात भूषणसिंह होळकर यांनी शरद पवारांवर केला होता. मात्र, त्यानंतर हा वाद मिटला असून भूषण सिंह होळकर १८ तारखेला शरद पवार यांच्या पक्षात प्रवेश करणार असून त्यांना राष्ट्रवादी युवक काँग्रेसचे उपाध्यक्ष पद देणार असल्याचे देखील माहिती आहे.थेट अहिल्यादेवी होळकर यांचे तेरावे वंशज पक्षात येत असल्याने शरद पवार यांना एक मोठा धनगर चेहरा आपल्या पक्षात मिळणार आहे.
अजित पवार यांनी पक्ष फोडल्यानंतर शरद पवार यांच्यासोबत एकही महत्त्वाचा धनगर नेता नाहीये. त्यासाठी सुरुवातीला शरद पवार यांनी महादेव जानकर यांना माढा लोकसभा मतदारसंघाची उमेदवारी देण्यासाठी गळ घातली मात्र ऐनवेळी फडणवीसांनी सूत्र फिरवत महादेव जानकर यांना महायुतीतच थांबवले. त्यामुळे महाराष्ट्रात आणि विशेषतः बारामतीमध्ये धनगर मतदार आपल्याकडे वळवण्यासाठी शरद पवार यांच्याकडे कुठलाही मोठा चेहरा नव्हता.
मात्र, तो आता भूषणसिंह होळकर यांच्या रूपाने मिळाल्यानंतर होळकर यांना बारामती आणि महाराष्ट्रात स्टार प्रचारक म्हणून पवार महाराष्ट्रभर फिरवणार असल्याची माहिती आहे.
