मुंबई
शिकवणी घेणाऱ्या एका शिक्षिकेने तीन वर्षाच्या चिमुकलीला काविलत्याने चटके दिल्याची संतापजनक घटना खारघर येथे उघकीस आली आहे. खारघर सेक्टर 15 मधील घरकुल सोसायटीमध्ये खारघर घरगुती शिकवणी घेणाऱ्या साधना गायकवाड यांनी हा संतापजनक प्रकार केल्याचा आरोप विद्यार्थीनीच्या कुटुंबीयांकडून करण्यात आला आहे.
मिळालेल्या माहितीनुसार, आरोपी साधना गायकवाड या घरकुल सोसायटीमध्ये घरगुती शिकवणी घेतात. याच सोसायटीमध्ये राहणाऱ्या एका वावरे कुटुंबियाने आपल्या 3 वर्षाच्या मुलीला प्रीप्रायमरी शिकवणीसाठी गायकवाड यांच्याकडे पाठवले होते.
गुरुवारी आरोपी शिक्षिकेने या 3 वर्षीय मुलीला घरातील काविलता गरम करून अंगावर चटके दिल्याचा प्रकार घडला.घरी आल्यावर मुलगी रडत असल्याने तसेच चटक्याचे डाग दिसल्याने पालकांनी या घटनेचा जाब विचारत खारघर पोलीस ठाणे गाठले. पोलिसांनी विचारल्यावर आरोपी शिक्षिकेने सदर प्रकार घडला नसल्याचे सांगितले.
मात्र, शिकवणीसाठी येणाऱ्या विद्यार्थ्यांना विचारले असता सर्व सत्यता समोर आली.याप्रकरणी खारघर पोलीस ठाण्यात आरोपी शिक्षिकेविरोधात कलम 324 तसेच ज्यूवेनाईल जस्टीस ऍक्ट प्रमाणे गुन्हा दाखल केला असून अधिक तपास करण्यात येत असल्याची माहिती नवी मुंबई पोलीस उपायुक्त शिवराज पाटील यांनी सांगितली.
या घटनेमुळे पुन्हा एकदा खासगी शिकवणी घेणाऱ्या शिक्षकांची माजोरी दिसून येत आहे. या आधी देखील खासगी शिकवण घेणाऱ्या शिक्षकांकडून लहान मुलांना बेदम मारहाण करण्याच्या अनेक घटना समोर आल्या आहेत.
