पुणे
विशेष ग्रामसभा सुरु असताना ठराव मांडण्यासाठी ग्रामपंचायत अधिकाऱ्याने नकार दिला. या कारणावरून एका व्यक्तीने ग्रामपंचायत अधिकाऱ्याला धक्काबुक्की करत सरकारी कामात अडथळा निर्माण केला.ही घटना बुधवारी (१७ सप्टेंबर) दुपारी भूगाव ग्रामपंचायत कार्यालयात घडली.
ग्रामपंचायत अधिकारी जगन्नाथ महादेव भोंग (५५, सिंहगड रोड, पुणे) यांनी बावधन पोलीस ठाण्यात फिर्याद दिली आहे. त्यानुसार कैलास केशव चोंधे (चोंधे-दरा, भुगाव, मुळशी) याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, मुख्यमंत्री समृद्ध पंचायतराज अभियानाअंतर्गत भूगाव ग्रामपंचायत कार्यालयात बुधवारी विशेष ग्रामसभेचे आयोजन करण्यात आले होते. या ग्रामसभेत आरोपीने दक्षता समिती स्थापन करण्याचा ठराव मांडला.
त्यावर ग्रामपंचायत अधिकारी भोंग यांनी विशेष ग्रामसभेत असा ठराव मांडता येत नसल्याचे कारण सांगितले. या कारणावरून कैलास याने भोंग यांना शिवीगाळ करत दमदाटी केली, त्यांच्या शर्टची कॉलर पकडून धक्काबुक्की केली आणि सरकारी कामात अडथळा आणला. बावधन पोलीस तपास करत आहेत.
