पुणे
जुन्नर तालुक्यातील गुळुंजवाडी येथे भीषण अपघात झाल्याची घटना घडली. अंत्यविधी वरुन परत येताना काही नागरिकांना एका भरधाव ट्रकने उडवलं आहे. या अपघातात तिघांचा जागीच मृत्यू झाला. धक्कादायक घटना अशी की, आपल्या मुलाला उपचारासाठी दुचाकीवरुन घेऊन जात असताना त्या भरधाव ट्रकने त्यांच्या दुचाकीला पाठीमागून धडक दिली. या अपघातात माय-लेकाचा जागीच मृत्यू झाला. तर मुलाचे वडील गंभीर जखमी झाले आहेत. त्यांना पुणे येथील रुग्णालयात दाखल करण्यात आलं आहे.
शितल योगेश दाते आणि त्यांचा लहान मुलगा श्रीयांश योगेश दाते (रा. आणे, ता. जुन्नर) यांचा घटनास्थळी जागीच मृत्यू झाला आहे. तर योगेश हे गंभीर जखमी झाले आहेत. माय-लेकाच्या अशा निधनाची, मन हेलावणारी बातमी अनेकांच्या मनाला चटका लावून गेली आहे.
याबाबत मिळालेली माहिती अशी की, आणे गावामधून दाते कुटुंब मुलाच्या उपचारासाठी मंचरकडे दुचाकीने निघाले होते. बेल्हे गावच्या पुढे आल्यानंतर गुळुंजवाडी गावाजवळ अंत्यविधीचा कार्यक्रम सुरू होता. हा कार्यक्रम संपल्यानंतर मोठ्या संख्येने नागरिक रस्त्यावर यायला लागले. यामध्ये या कुटुंबाचा देखील समावेश होता.
त्याचवेळी नगरच्या बाजूने येणाऱ्या एका भरधाव ट्रकने रस्त्यावरून जाणाऱ्या दुचाकीस्वारांना आणि नागरिकांना जोरात धडक दिली. या अपघातात शीतल आणि त्यांचा छोटा मुलगा श्रीयांश या दोघांचा जागीच मृत्यू झाला.योगेश आणि शीतल यांना श्रीयांश हा एकुलता एक मुलगा होता. मात्र झालेल्या अपघातात माय लेकाला आपला जीव गमावावा लागला. तर योगेश यांची प्रकृती देखील गंभीर असून त्यांना पुढील उपचारासाठी पुण्यातील रुग्णालयात दाखल करण्यात आल्याची माहिती समोर येत आहे.
अंत्यविधीनंतर घडलेली अपघाताची ही घटना अंगवार शहारे आणणारी आहे. कोणतीही चूक नसताना दाते कुटुंबातील माय – लेकराला नाहक आपला जीव गमवावा लागला. अंगावर शहारे आणणारी ही घटना मन हेलवणारी असून या घटनेने अनेकांनी हळहळ व्यक्त केली आहे.
