पुणे
तू तुझ्या पतीला आणि मुलांना सोडून माझ्याकडे ये”, असं म्हणत असल्याने वारंवार प्रियकर आणि प्रेयसी यांच्यात भांडणे होत होती. या भांडणाला वैतागून आपल्या मित्रासोबत मिळून प्रेयसीने प्रियकराची दगडाने ठेचून हत्येचा प्रयत्न केला आहे. या घटनेचा व्हिडिओ देखील समोर आला आहे. ही घटना पिंपरी-चिंचवड परिसरात घडली आहे. या घटनेनं पिंपरी-चिंचवड परिसरात एकच खळबळ उडाली आहे.
चिखली पोलिसांनी या प्रकरणी प्रेयसी आणि तिचा मित्र आरोपी प्रेमदास विठ्ठल चव्हाण यांच्या विरोधात गुन्हा दाखल केला आहे. या घटनेत प्रियकर अब्दुल कलाम हा गंभीर जखमी झाला असून त्यांच्यावर उपचार सुरू आहेत. चिखली परिसरातील जाधववाडी वडाचा मळा या भागामध्ये हा प्रकार घडला आहे.
पोलिसांनी दिलेल्या माहितीनुसार, प्रेयसी आणि प्रियकर अब्दुल कलाम यांच्यात गेल्या अनेक दिवसांपासून संबंध होते. प्रेयसीचा विवाह झाला आहे. त्यामुळे प्रियकर आपल्या प्रेयसीला ”पती आणि मुलाबाळांना सोडून माझ्याकडे राहण्यासाठी ये”, या गोष्टीवरून सतत दोघांमध्ये वाद होत होते. या गोष्टीलाच कंटाळून अखेर प्रेयसीने आपल्या मित्राच्या मदतीने प्रियकराचा काटा काढण्याचे ठरवले.
त्यानुसार चिखली परिसरात प्रेयसीने मित्राच्या मदतीने प्रियकरावर हल्ला केला. त्याला दगडाने ठेचून मारण्याचा प्रयत्न केला. यामध्ये प्रियकर अब्दुल कलाम गंभीर जखमी झाला आहे. त्याच्यावर रुग्णालयामध्ये उपचार सुरू आहेत. या घटनेचा व्हिडिओ समोर आला आहे. चिखली पोलिसांना याबाबत माहिती मिळाल्यानंतर पोलिसांनी प्रेयसी आणि तिच्या मित्राला अटक केली आहे.
पिंपरी चिंचवडमध्ये असा प्रकार घडल्याने एकच खळबळ उडाली आहे. पिंपरी चिंचवड परिसरामध्ये दिवसेंदिवस अशा घटनांमध्ये वाढ होत आहे. दिवसाढवळ्या हा प्रकार घडल्याने कायदा सुव्यवस्थेचा प्रश्न निर्माण झाला आहे. या प्रकरणी अधिक तपास चिखली पोलीस करत आहेत.
