पुणे
जिल्हा परिषद प्राथमिक शाळेतील 54 वर्षीय शिक्षकाला नग्न व्हिडिओ व्हायरल करण्याच्या धमकीने ब्लॅकमेल करण्यात आले. पुणे जिल्ह्यातील बारामती तालुक्यात हा धक्कादायक प्रकार घडला आहे.शिक्षकाकडून एक लाख 15 हजार 350 रुपये उकळण्यात आल्याचा आरोप आहे. या प्रकरणी वडगाव निंबाळकर पोलिसांनी अभिषेक विठ्ठल पांचाळ, रा. चाकण, मूळ रा. उदगीर, जि. लातूर आणि सिद्धांत माधव गगनभिडे, रा. चाकण, मूळ रा. पाटोदा बुद्रूक, जि. लातूर या दोघाच्या विरुद्ध गुन्हा दाखल केला आहे.
मे 2025 मध्ये पीडित शिक्षकाला एका महिलेच्या नावाने फेसबुकवर फ्रेंड रिक्वेस्ट आली होती. रिक्वेस्ट स्वीकारल्यानंतर दोघांमध्ये चॅटिंग सुरु झाले आणि इन्स्टाग्रामवरही संपर्क वाढला. काही दिवसांनी त्या खात्यावरून नग्नावस्थेतील महिलेने व्हिडिओ कॉल केला. इतक्यावरच न थांबता तिने शिक्षकाला कपडे उतरवण्यास भाग पाडले.
शिक्षकाने नकार दिल्यावर चॅटिंग आणि व्हिडिओ कॉलचे स्क्रीनशॉट व्हायरल करण्याची धमकी दिली. भीतीपोटी शिक्षकाने धमकीला बळी पडत कपडे काढले. त्यानंतर अभिषेक पांचाळ याने शिक्षकाला फोन करून त्यांचे नग्न फोटो आणि व्हिडिओ व्हॉट्सअपवर पाठवले. दोन लाख रुपये द्या, नाहीतर व्हिडिओ व्हायरल करुन नोकरी धोक्यात टाकण्याची आणि जीवे मारण्याची धमकी दिली.
समाजात बदनामीच्या भीतीने शिक्षकाने काही रक्कम पाठवली. पांचाळने सिद्धांतच्या फोन पे खात्यावर 30 हजार आणि 7 जुलैला 70 हजार रुपये उकळले. 29 ऑगस्टला पुन्हा एक लाखाची मागणी करत गावात येऊन धमकी दिली. शिक्षकाने हा प्रकार पुतण्याला सांगितल्यानंतर पोलिसांत फिर्याद दिली. पोलिसांनी गुन्हा दाखल करून तपास सुरू केला आहे.
