पुणे
करोना साथीरोगाच्या काळात वडिलांना करोना झाल्याचे भासवले आणि उपचारासाठी रुग्णालयात दाखल करून तिथे जीवे मारले,’ असा आरोप लहान भावाने मोठ्या भावासह चुलत भावावर केला आहे. या प्रकरणी न्यायालयाच्या आदेशाने खुनाचा गुन्हा नोंदवण्यात आला आहे.
नारायण बापू तेलोरे असे मृत्यू झालेल्या व्यक्तीचे नाव आहे.लहान भावाने मोठ्या भावाविरोधात न्यायालयात तक्रार दाखल केली आहे. त्यामुळे पुणे पोलिस आता या खुनाचा तपास करून न्यायालयात सविस्तर अहवाल सादर करणार आहेत.
या प्रकरणी मृताचा मोठा मुलगा, पुतण्या, लोणी काळभोर टोलनाका परिसरातील एक रुग्णालय आणि अन्य एका विरोधात गुन्हा नोंदवण्यात आला आहे.पोलिसांनी दिलेल्या माहितीनुसार, तेलोरे कुटुंबीय मूळचे नगर जिल्ह्यातील राहुरी तालुक्यातल्या ब्राह्मणी गावचे आहे.
तक्रारदाराचे वडील नारायण यांना मे २०२१मध्ये करोना झाल्याने स्थानिक रुग्णालयात दाखल केले होते. त्यांची प्रकृती गंभीर झाल्याने त्यांना पुण्यातील लोणी काळभोर टोलनाका परिसरातील एका खासगी रुग्णालयात दाखल केले होते. तेथे उपचार सुरू असताना त्यांचा मृत्यू झाला.करोनामुळे नारायण यांचे शवविच्छेदन झाले नव्हते.
मात्र, त्यांच्या लहान मुलाने न्यायालयात दावा दाखल केला. ‘वडिलांना करोना झाल्याचे भासवून रुग्णालयात दाखल केले; तसेच तेथे जीवे ठार मारले,’ असे तक्रारीत म्हटले आहे. या प्रकरणात न्यायालयाने १५६(३)नुसार गुन्हा दाखल करून तपास करण्याचे आदेश पोलिसांना दिले आहेत. त्यानुसार हा गुन्हा नोंद झाल्याची माहिती देण्यात आली. तक्रारदार आणि आरोपींमध्ये वाद आहेत. यापूर्वीही स्थानिक पोलिस ठाण्यांमध्ये तक्रारी दाखल आहेत, असे हडपसर पोलिसांकडून सांगण्यात आले.
