बीड
दहावीचा पेपर देऊन घरी जाणाऱ्या विद्यार्थीनीचा हात पकडून ‘चल माझ्यासोबत, तुझ्या आई- वडिलांना लग्न करून द्या म्हणू..’ असे म्हणत दहावीच्या विद्यार्थिनीचा विनयभंग केल्याची धक्कादायक घटना बीड शहरात उघडकीस आली. तसेच आईलाही शिवीगाळ करत जीवे मारण्याची धमकी दिली. याप्रकरणी बीड शहर पोलिस ठाण्यात गुन्हा दाखल करण्यात आला असून पाेलिसांनी आरोपी अटक केली आहे.
पीडिता व आरोपी एकाच गल्लीत राहत असून एकाच ठिकाणी शिक्षणही घेत आहेत. पीडिता ही दहावीच्या परिक्षेसाठी घराबाहेर पडली. यावेळी आरोपी तरुण तिचा पाठलाग करत मागे आला. दुपारी पेपर संपल्यानंतर ती केंद्रातून बाहेर आली. यावेळी आरोपी देखील बाहेर उभाच होता. त्याने थेट तिचा हात पकडत म्हणाला ‘चल माझ्यासोबत..आपण तुझ्या घरी जावू आणि तुझ्या आई-वडिलांना लग्न करून द्या, असे म्हणू’. असे म्हणत तिच्याशी हुज्जत घालू लागला.
पीडितेने झटका मारून त्याच्या हातातून हात सोडला. नंतर ती घराच्या दिशेने जात असतानाही तो मागेच आला. याचवेळी पीडितेची आई तेथे आली. तिने आरोपीला जाब विचारताच त्याने त्यांनाही शिवीगाळ करत जीवे मारण्याची धमकी दिली. त्यानंतर पीडितेने आई-वडिलांसह बीड शहर पोलीस ठाणे गाठून फिर्याद दिली. यावरून आरोपी विरोधात गुन्हा दाखल करण्यात आला असून त्याला ताब्यात घेण्यात आलं आहे.
