पुणे
अहमदनगर जिल्ह्यातील कर्जत तालुक्यातून काळीज पिळवटून टाकणारी घटना समोर आली आहे. एकुलत्या एक विवाहित लेकीच्या मृत्यूची खबर ऐकता क्षणीच बापानेही इहलोकीचा निरोप घेतला. ही दुर्देवी घटना शुक्रवारी घडली. बाप आणि लेकीचा एकाच दिवशी मृत्यू झाल्याने परिसरातून मोठी हळहळ व्यक्त होत आहे.
मीनाक्षी सोमनाथ पवार (वय ३४, रा. डोर्लेवाडी, ता. बारामती, जि. पुणे) आणि भागवत विष्णू दंडे (वय ६५, रा. देशमुखवाडी, ता. कर्जत) अशी मृत बाप-लेकींची नावे आहेत. प्राप्त माहितीनुसार, अंगणवाडी सेविका असलेल्या मीनाक्षी पवार या काही दिवसांपासून आजारी होत्या.
त्यांच्यावर रुग्णालयात उपचार सुरू होते. मात्र, शुक्रवारी उपचारादरम्यान त्यांची प्राणज्योत मालवली. याची खबर त्यांचे वडील भागवत दंडे यांना समजताच क्षणी त्यांना हृदयविकाराचा तीव्र धक्का बसला आणि त्यातच त्यांचाही मृत्यू झाला.बाप-लेकीचा एकाच दिवशी मृत्यू झाल्याने राशीनसह परिसरात हळहळ व्यक्त होत आहे.
मीनाक्षी यांच्या मागे पती, दोन मुले आणि सासू-सासरे, तर दंडे यांच्या मागे पत्नी, एक मुलगा, सून आणि नातवंडे, असा परिवार आहे. दंडे हे पैलवान असल्याने राशीनमध्ये वस्ताद नावाने सुपरिचित होते. मीनाक्षीवर डोर्लेवाडी येथे, तर दंडे यांच्यावर देशमुखवाडीत अंत्यसंस्कार करण्यात आले.