जालना
जालना पोलिस अधीक्षक कार्यालयात कार्यरत असलेल्या महिला पोलिस शिपाई सुनीता ईश्वरसिंग ढोबाळ या मुलासह मकरसंक्रांत सणानिमित्त इब्राहिमपूर (ता. भोकरदन) या मूळ गावी जात होत्‍या. या दरम्‍यान त्यांच्या स्कुटीचा आणि बैलगाडीत अपघात झाल्याने यात त्यांचा दुर्देवी मृत्यु झाल्याची घटना घडली. राजूर- भोकरदन महामार्गावरील हॉटेल हरिद्वार समोर सदर अपघात घडला. पोलिस शिपाई सुनीता ईश्वरसिंग ढोबाळ या आपल्या मुलासह मकरसंक्रांत सणानिमित्त इब्राहिमपूर गावी जात होत्‍या. त्यांचा मुलगा स्कुटी चालवत असताना सामोरून येणाऱ्या वाहनाचा अंदाज न आल्याने त्यांची स्कुटी रस्त्याने जाणाऱ्या बैलगाडीवर जाऊन जोरदार आदळली. या अपघात त्यांच्या डोक्याला जबर दुखापत झाल्याने त्यांचा जागीच मृत्यु झाला.
स्कुटी चालवत असलेला त्यांचा मुलगा गंभीर जखमी झाल्याने परिसरातील नागरिकांनी त्याला उपचरासाठी रुग्णालयात हलविले आहे. या घटनेची माहिती पोलिस अधिक्षक कार्यालयात कळताच हळहळ व्यक्त केली जात आहे. तर त्यांच्या इब्राहिमपूर गावात शोककळा पसरली आहे. घटनेची माहिती मिळताच राजूर पोलिसांनी घटनास्थळी धाव घेऊन अपघाताचा पंचनामा करत घटनेची नोंद पोलिस डायरीत करत या प्रकरणी पंचनामा ही केला आहे.
