पुणे
घरातील सोने गहाण ठेवून कांद्याच्या लागवडीला पैसा उभा केला. मात्र सोलापूर कृषी उत्पन्न बाजार समितीत याच कांद्यांच्या २४ पोती विकल्यानंतर हाती आले ते फक्त ५५७ रुपये. हताश झालेल्या अवस्थेत आम्हीही आता गळफास घ्यायचा का? असा उद्वीग्न प्रश्न उपस्थित केला आहे. मारुती उमाकांत खांडेकर असे या शेतकऱ्याचे नाव.
अक्कलकोट तालुक्यातील कुरनूर येथील रहिवासी असणाऱ्या या शेतकऱ्याने कष्टाने पिकवलेला कांदा सोलापूर कृषी उत्पन्न बाजार समितीत कांदा विक्रीसाठी आणला होता. मात्र कांद्याला कवडीमोल भाव मिळाल्याने शेतकऱ्याच्या डोळ्यात पाणी आले आहे.
मारुती खांडेकर या शेतकऱ्याने शनिवारी सकाळी सोलापूर कृषी उत्पन्न बाजार समितीत कांदा विक्रीसाठी आणला होता. बाजारात कांद्याची मोठ्या प्रमाणात आवक झाल्याने दर घसरले होते. दुपारी १२च्या सुमारास व्यापाऱ्यांनी मारुती खांडेकर यांचा कांदा लिलावास काढताच फक्त ४५ पैशांचा भाव मिळाला.
व्यापाऱ्यांने हमाली, तोलाई, गाडी भाडे असा सर्व खर्च वजा करत फक्त ५५७ रुपये असलेली पट्टी शेतकऱ्याच्या हातावर टेकवली. २४ पोती कांद्याची २८६६ रुपयांना विक्री झाली होती. त्यातून हमाल, गाडी भाडे, तोलाई असे २३०९ रुपये वजा झाले. मारुती खांडेकर या शेतकऱ्याच्या कांद्याला ४५ पैसे प्रमाणे २४ पोतींचा केवळ ५५७ रुपये भाव मिळाला.
अक्कलकोट तालुक्यातील मारुती खांडेकर या शेतकऱ्याने कांदा उत्पादनासाठी सोने गहाण ठेवले होते. जवळपास ५८ हजार रुपये खर्च करून २४ पोत्याचे कांदा उत्पादन केले होते. मात्र सोलापूर मार्केट यार्डात कांद्याची आवक मोठ्या प्रमाणात झाल्याने दर घसरणीचा मोठा फटका शेतकरी मारुती खांडेकर यांना बसला आहे.
परिणामी शेतकरी हताश होऊन आम्ही आत्महत्या का नाही करावी हा सवाल उपस्थित करत आहेत. व्यापाऱ्याने दिलेली ही ५५७ रुपयांची पट्टी सोशल मीडियावर सध्या व्हायरल होत आहे.
