पुणे
बारामती लोकसभा मतदारसंघातून मोठी बातमी समोर आली आहे. महाविकास आघाडीच्या बारामती मतदारसंघातील उमेदवार खासदार सुप्रिया सुळेंना निवडणूक होण्याआधीच मोठा धक्का बसला आहे. सुप्रिया सुळे यांचे प्रचार प्रमुख असलेले प्रवीण माने अजित पवार गटामध्ये सहभागी झाले आहेत.
माने कुटुंब पवार कुटुंबीयांसोबत राहिलं आहे. अजित पवार यांचे हात बळकट करण्यासाठी माने कुटुंब त्यांच्याबरोबर राहणार आहे, असं म्हणत मानेंनी आपल्या हाती घड्याळ बांधलं आहे.
अजित पवार हे विकसासाठी भाजप बरोबर गेले आहेत. आम्ही देखील विकास व्हावा यासाठी अजित पवार यांच्याबरोबर जात आहोत. अजित पवारांनी अनेक विकास कामे केली आहेत. आम्ही ठामपणे अजित पवार यांच्याबरोबर जाण्याचा निर्णय घेतला आहे. आजपासून आम्ही त्यांचा प्रचार सुरू करत आहोत, अशा शब्दांत प्रवीण मानेंनी आपली भूमिका स्पष्ट केली आहे.
महायुतीच्या उमेदवार सुनेत्रा पवार यांच्या प्रचारात सक्रिय होवून नरेंद्र मोदी यांना तिसऱ्यांदा पंतप्रधान करण्यासाठी व उपमुख्यमंत्री अजित पवार यांचे हात बळकट करण्यासाठी हा निर्णय घेतला आहे, असंही प्रविण माने यांनी आपली भूमिका स्पष्ट करताना म्हटलं आहे.